Jólapartý Minniboltans

Á morgun laugardag, er glæsilegt jólapartý hjá Minniboltanum. Verður farið í ýmsa skotleiki eins og troðslu, víta og 3ja stiga keppni sem og hörku þrautakeppni verður í gangi. Einnig verður farið í stingerkeppni og verða flott verðlaun fyrir hinar og þessar þrautir. Dregið verður í happdrætti og einnig verða veitt verðlaun fyrir bestu mætingarnar það sem af er tímabili. Pöntuð verður pizza og gos og verður skemmtunin pottþétt í hámarki. Allir mæta í einhverju tengt jólunum, s.s. hvít og rauð þema og geta krakkarnir komið með snakk eða bland í poka með sér enda laugardagur.

Dagskráin byrjar á slaginu 10:30 og er til tæplega 14:00. Mælum með að leikmenn mæti tímanlega og er foreldrum velkomið að fylgjast með.

Er Bjössi þjálfari búinn að fá góða aðstoðarmenn með sér á morgun en þetta eru þeir: Alexander Jarl Þorsteinsson 9.fl, Tómas Orri Tómasson 8.fl og Kristján Tómasson 10.fl og M.fl
 

www.ibv.is/karfa

Eyjapeyjar í landsliðsúrtaki.

2 úr ÍBV í 28 manna hóp landsliðsins 

Í dag var valið í 28 manna hóp fyrir U-16 ára landslið Íslands eða öllu heldur strákar fæddir árið 1992. Voru 2 leikmenn frá ÍBV valdir í þennan hóp en það eru þeir Kristján Tómasson og Ólafur Sigurðsson. Hafa þessir peyjar verið að standa sig virkilega vel með 10.flokk félagsins ásamt því að vera að æfa og spila með Meistaraflokknum. Kristján hefur meira segja verið byrjunarmaður þar og Óli hefur einnig komið við sögu í leikjum liðsins.

Kristján og Óli eiga þetta svo sannarlega skilið enda skynsamir og mjög duglegir strákar og vonandi að þeir komist alla leið í lokahópinn sem fer á Norðurlandamótið næsta sumar! Allt er hægt ef viljinn er fyrir hendi og bara um að gera að halda áfram að æfa vel og gera sitt besta. Til hamingju með þetta peyjar.

Bjössi Einars þjálfari.

Áfram í bikarnum.

10. fl. 16 liða í bikark  Grindavík-ÍBV 49-53

Aðeins 7 leikmenn fóru í þessa ferð og hafðist sigur í jöfnum og spennandi leik. Óli var kominn með 3 villur eftir aðeins 4 mínútur af leiknum og þurfti að sitja út fyrri hálfleikinn sökum þess. Staðan eftir 1 leikhluta var 18-13 fyrir Grindavík. Vorum undir 22-16 í byrjun 2. leikhluta en náðum að komast yfir 26-27 í hálfleik. Héldum áfram að sigla framúr þeim og allt í einu var staðan orðin 28-38 okkar mönnum í vil. Áttum öll fráköst á þessum tíma og vorum að nýta okkar færi ágætlega. En heimamenn gáfust ekki upp og náðu að komast aftur yfir og staðan eftir 3 leikhluta var 43-42 fyrir Grindavík. Kristján var að finna sig vel og skoraði 10 stig í 3. leikhluta. Síðasti leikhluti var áfram jafn og spennandi en okkar menn náðu að landa góðum sigri 49-53 en sigurinn hefði án efa getað verið meiri því við vorum að klúðra alltof mikið af vítum í fyrri hálfleik og stuttum skotum í þeim síðari. 7 leikmenn sem spiluðu þennan leik, Óli spilaði mjög lítið sökum villuvandræða en hann tryggði einmitt sigurinn í lokin á vítalínunni. Stóðu allir sig vel þó að hittnin hafi verið betri hjá liðinu og þá aðallega Kristjáni og Teit í 3ja en menn voru að berjast allan tímann og peppa hvorn annan áfram. Góður sigur og þá sérstaklega þar sem við vorum fáir og á útivelli!

Stigaskor: Kristján 24, Teitur 11, Ólafur 7, Alexander Jarl 6, Einar Kristinn 3, Hlynur 2 og Heiðar 0.

Dregið verður í 8 liða úrslitum eftir 1-2 vikur.

Áfram ÍBV

Úrslit í leikjum helgarinnar.

Meistaraflokkur tapaði  fyrir Mostra 51-55, staðan í hálfleik var 21-22 fyrir ÍBV.  Bjössi meiddist á ökla eftir 3 mínútur og spilaði ekki meira með. Addi var í villuvandræðum strax eftir 1. leikhluta og fór út af í byrjun 4.leikhluta.  Binni var skástur í leiknum og Diddi í blálokin.  Ekki það sem menn ætluðu sér,  að tapa þessum leik.

 

 9.flokkur spilaði við Breiðablik bikarnum og hafði  sigur 84-35 og eru þar með komnir áfram. 

 

ÍBV fær góðan liðsstyrk.

Góður liðsstyrkur væntanlegur í meistaraflokkinn

Sigurjón Örn Lárusson heitir sá kappi og er 195cm á hæð. Spilar hann sinn fyrsta leik fyrir félagið strax eftir áramót. Mun Sigurjón styrkja liðið mikið og ekki verra að fá fleiri góða á æfingarnar hér í eyjum.

Næsta sunnudag mun Sigurjón hinsvegar leika sinn síðasta leik fyrir körfuknattleikslið Stjörnunnar þar sem hann hefur ákveðið að flytjast búferlum til Vestmannaeyja ásamt kærustu sinni Berglindi Þórðardóttur og barni. Brotthvarf Sigurjóns er nokkur blóðtaka fyrir nýliða Stjörnunnar en Sigurjón hefur alla sína tíð leikið í Garðabænum og fór á kostum á síðustu leiktíð þegar Stjarnan tryggði sér sæti í úrvalsdeildinni eftir oddaleik í úrslitakeppni 1. deildar gegn Valsmönnum.

Mun Sigurjón brátt hefja störf hjá Deloitte endurskoðunarstofu í Vestmannaeyjum. Sigurjón gerði 6,3 stig að meðaltali í leik með Stjörnunni á þessu tímabili ásamt því að taka alls 29 fráköst í sjö leikjum en þau munu án efa verða fleiri með okkur í 2.deildinni. Hann leikur kveðjuleik sinn með Stjörnunni á sunnudag þegar nýliðarnir taka á móti ÍR og er væntanlegur til eyja á miðvikudag n.k.

Bjóðum við Sigurjón Örn velkominn til Vestmannaeyja og til liðs við ÍBV.  Áfram ÍBV.  ibv.is/karfa

 

Menn að meiri.

Vegna þeirrar umfjöllunar sem hér er að neðan og barst víðar um netheima þá viljum við vísa í þessa afskökunarbeiðni sem ÍBV hefur borist. Þarna sýna þeir félagar okkar hjá ÍR að þeir eru menn til að viðurkenna mistökin og eru menn að meiri fyrir vikið.

 

28. nóvember 2007

Afsökunarbeiðni frá ÍR-ingum.

Okkur er bæði ljúft og skylt að birta þetta bréf frá ÍR ingum og tökum að sjálfsögðu þessa beiðni til greina, með von um það að öll okkar samskipti verði góð eins og þau hafa reyndar verið, ef þetta eina atvik er undanskilið. Með körfuboltakveðju.

 Kæri Björn, aðrir forráðamenn körfuknattleiksdeildar ÍBV og iðkendur  körfubolta í 9.flokki drengja. 

Vegna atviks sem átti sér stað síðastliðna helgi þar sem láðist að tilkynna um forföll okkar ÍR-inga vegna bikarleiks sem átti að spilast laugardaginn 24.nóvember viljum við biðjast afsökunar á þeim mistökum sem áttu sér stað vegna málsins. Okkur er ljóst að framferði okkar er ekki til eftirbreytni en þar sem um mannleg mistök var um að ræða er það von okkar að þið takið afsökunarbeiðni okkar til greina.

 Sérstaklega viljum við taka fram að við hörmum háttsemi okkar, þ.e. að tilkynna ekki forföll í leikinn, enda kemur hún mest niður á iðkendum flokksins sem hafa vafalaust hlakkað til að fá að spila á sínum heimavelli.

 Vegna þessa máls munum við þjálfarar sem og aðrir sem koma að starfsemi körfudeildar ÍR læra af reynslunni og munu mistök sem þessi ekki endurtaka sig.

Með von um gott gengi í bikarkeppninni sem og á öðrum vígstöðum.

 Með kveðju, f.h. körfuknattleiksdeildar ÍR,

 Elvar Guðmundsson og Sveinbjörn Claessen, þjálfarar 8.flokks drengja ÍR.

ibv.is/karfa

Þetta er fyrir neðan allar hellur ÍR-ingar.

9. flokkur  ÍBV  átti að spila bikaleik við  ÍR  sl. laugardag, kl.  17.     Leikmenn ÍBV  voru auðvitað geysilega ánægðir og spenntir að fá að spila á heimavelli við  lið frá ÍR sem  á að  heita  eitt af stórliðum Íslands í  körfubolta.  Menn voru  mættir tímanlega til leiks,  og dómarar  komnir alla leið frá  Reykjavík til að dæma leikinn.   En ekkert  lið frá  ÍR ?  Jú, jú þeir  bara  ákváðu upp á sitt einsdæmi að  vera ekkert að leggja það á sig að  ferðast  til  Vestmannaeyja til að spila körfubolta, það væri nú allt of erfitt að vera að standa  í því.  OG LÉTU ENGAN VITA  AF ÞESSARI  ÁKVÖRÐUN.    Þessi  framkoma  er svo  gjörsamlega fyrir neðan allar hellur að  menn verða  bara orðlausir af undrun.    Hvers konar  aumingja skapur  er þetta eiginlega  ?   Krakkarnir frá okkur  eru að fara í keppnisferðir víða um land  mörgu sinnum  yfir  veturinn,  og  telja það ekki eftir  sér.   En nei,  ef það þarf að  leggja  eitthvað á  sig á  móti  í eitt skipti af  okkar  mótherjum,  þá er  bara EKKERT VERIÐ AÐ MÆTA.   Það sem svíður mest undan svona framgöngu er að þessir peyjar  okkar sem eru að leggja á sig ómælt erfiði við æfingar og keppnisferðir til að taka þátt, og ferðast til þess mörgun sinnum yfir veturinn , fá ekki langþráðan leik á heimavelli.  Þetta kemur mest niður þeim.  Þá langaði að SPILA á heimavelli,  það er skemmtilegast, það eru laun erfiðisins.   

Minnibolti 11 ára í topp 3 á landinu.

http://www.ibv.is/karfa/:  Minnibolti 11 ára og yngri voru að keppa í Garðabæ um helgina. Voru spilaðir 3 leikir á laugardag og 1 snemma á sunnudag svo allir leikmenn og þjálfari myndu ná leik ÍBV og Keflavíkur í meistaraflokknum í eyjum kl.15.. Í fyrsta leiknum vantaði okkur 3 leikmenn og þar af voru 2 byrjunarliðsmenn og mjög stór partur í síðasta móti en þetta eru þeir Ársæll, Hafsteinn "varnarjaxl" og Valli(164cm). Spiluðum við heimalið Stjörnunnar en staðan í hálfleik var 34-22 fyrir heimamenn. Komu okkar peyjar sterkir til seinni hálfleiks og náðu að komast yfir 40-43 í byrjun 4.leikhluta en Stjörnumenn náðu að innbyrða sigur á endasprettinum 52-49. Ef allir okkar sterkustu leikmenn hefðu spilað þennan leik þá hefði aldrei verið spurning hvorum megin sigurinn hefði endað! Aron og Siggi báru af í þessum leik og vantaði okkur varnarleikinn í þessum leik en það kemur bara næst. Stigaskor: Aron 20, Siggi 11, Geir 8, Devon 6, Kristberg 2, Tindur 2.

Annar leikur mótsins var á móti Grindavík. Byrjuðu Grindvíkingar líkt og i fyrra að spila svæðisvörn og jafnvel með 2 leikmenn að dekka Aron V. en fyrir þá sem ekki vita þá er bara leyfð maður á mann vörn í minniboltanum og er svona vörn kolólögleg. Ætla ekki að fara nánar út í þetta en þetta var jafn og spennandi leikur sem endaði að við unnum 45-41 en staðan var 45-37 þegar 1 mín var eftir og hefði sigurinn í raun getað orðið aðeins meiri en raun var vitni. Devon stóð sig mjög vel í þessum leik og þá sérstaklega í 1.leikhluta og Aron hélt okkur gangandi í síðari hálfleik. Ársæll bættist í hópinn í þessum leik og munaði um það. Stigaskor: Aron 19, Devon 10, Siggi 8, Geir 6, Kristberg 2.

Síðasti leikur dagsins og jafnframt þriðji leikurinn þennan dag var á móti Íslandsmeisturum Haukum. Byrjuðu Haukar leikinn mun betur og voru yfir 4-14 eftir fyrsta og 8-18 var staðan í hálfleik og var eins og okkar menn væru búnir á því og vantaði alla baráttu. Var það nú fljótt að breytast og eftir þriðja leikhlutann þar sem Geir skoraði 6 stig og Aron 10 var staðan allt í einu orðin 24-26 fyrir Hauka og spennan í hámarki. Lokaleikhlutinn var mjög jafn og skiptust liðin á að hafa forystu. Þegar lítið var eftir í stöðunni 36-37 tókum við leikhlé og vissu allir í húsinu að Aron V myndi taka skotið. Teiknuðum upp smá kerfi sem endaði með því að Aron fór framhjá 3 varnarmönnum Hauka og skoraði glæsilega körfu þegar 14 sekúndur voru eftir af leiknum og var mikið fagnað í okkar herbúðum hvort sem var á bekknum eða uppí stúku. Haukar fengu tækifæri til að vinna en við spiluðum rosa vörn í lokin og náðu þeir ekki einu sinni að skjóta á körfuna og því sigur 38-37. Stigaskor: Aron 25, Geir 8, Siggi 3, Kristberg 2.

Eini leikurinn okkar á sunnudeginum og einnig síðasti leikur okkar á mótinu var á móti sterku liði KR! Kom Hafsteinn inn í liðið þar sem handboltinn kláraði sitt á laugardag. Byrjuðu okkar peyjar rosalega vel og voru yfir 16-9 eftir 1. leikhlutann. En það fór allt úrskeiðis hjá okkur í öðrum leikhluta en í hálfleik var staðan orðin 22-32 fyrir KR! Var þetta nánast vendipunktur leiksins þar sem okkar leikmenn náðu sér alls ekki á strik eftir þetta. Endaði leikurinn 41-56 og var varnarleikurinn mjög slakur í þessum leik og vantai smá kjark og þor á móti þessum KR-ingum og að spila betri vörn en KR vildu þennan sigur greinilega meira en við að þessu sinni! Siggi var skástur í okkar liði en hann var að hitta mjög vel í lokin en það var bara því miður of seint fyrir okkur. Aron náði sér ekki á strik og komst lítt áleiðis í leiknum og spiluðu KR-ingar mjög góða vörn á kappann. Stigaskor: Aron 13, Siggi 12, Geir 6, Kristberg 4, Haffi 4, Devon 2.       Áfram ÍBV,    Bjössi þjálfari. 

http://www.ibv.is/karfa/

Keflvíkingar mættu með sínar stjörnur....

eyjafrettir.is  

Mynd: Óskar Pétur Friðriksson

Keflvíkingar reyndust ofjarlar 2. deildarliðs ÍBV þegar liðin áttust við í körfubolta í dag í Vestmannaeyjum.  Keflvíkingar unnu 120:65 og voru mun sterkari.  Eyjamenn gerðu þó það sem þeir gátu til að efsta lið úrvalsdeildarinnar þyrfti að hafa sem mest fyrir hlutunum.

Eyjamenn byrjuðu betur í leiknum, Björn Einarsson, þjálfari ÍBV kom ÍBV yfir strax í fyrstu sókn með glæsilegri þriggja stiga körfu og Eyjamenn leiddu fyrstu mínútuna eða svo.  Keflvíkingar voru hins vegar nokkuð fljótir að ná áttum og staðan eftir fyrsta leikhluta var 17:31 fyrir gestina, ekki svo slakt hjá heimamönnum.  Annar leikhluti var á svipuðum nótum, Keflvíkingar skoruðu í honum 30 stig á móti 17 stigum ÍBV og staðan í hálfleik því 34:61.  Reyndar fór það svo að í öllum leikhlutunum skoruðu gestirnir um 30 stig á meðan heimamenn skoruðu tæplega 20 en lokatölur urðu eins og áður sagði 65:120 Keflvíkingum í vil.

Leikmenn ÍBV geta þó gengið stoltir af velli enda voru þeir að leik gegn sterkasta liði Íslands í dag.  Munurinn á úrvalsdeild og 2. deild er gríðarlegur enda Keflvíkingar með þrjá erlenda leikmenn og æfa alla daga vikunnar á meðan leikmenn ÍBV koma víðs vegar að og ná ekki mörgum æfingum saman.  Það fór hins vegar ekkert á milli mála hverjir eru leikreyndastir hjá ÍBV, Björn þjálfari, Arnsteinn Ingi Jóhannesson og Baldvin Johnsen eiga allir leiki að baki í úrvalsdeild og báru þeir að miklu leyti uppi leik ÍBV.  Hins vegar var gaman að sjá innkomu hins unga Kristjáns Tómassonar, sem bar enga virðingu fyrir meistaraefnunum og skoraði ellefu stig.

Stigahæstir hjá ÍBV voru þeir Björn Einarsson 19,  Kristján Tómasson 11, Baldvin Johnsen 10, Arnsteinn Ingi Jóhannesson 9, Brynjar Ólafsson 8.

Keflavík:
Bobby Walker 26, Tommy Johnson 17, Sigfús Árnason (Sigfússonar) 17, Anthony Susnjara 11, Siggi Þorsteins 10

Eyjamenn spenntir fyrir stórleiknum..

www.ibv.is/karfa     Sunnudaginn 25.nóvember n.k. kl.15:00 er leikur hjá Meistaraflokknum í Bikarkeppninni. Er þetta 32.liða úrslit og mætum við liði Keflavíkur sem eru þessa dagana með yfirburða lið og eru sem stendur taplausir í Úrvalsdeildinni með 9 sigra og 0 töp. ÍBV eru taplausir í 2.deild með 3 sigra og því má búast við hörku leik á sunnudaginn.

Ætla okkar menn að gera sitt besta í þessum leik og má búast við fullt af áhorfendum á leikinn enda ekki á hverjum degi sem svona sterkt lið kemur til Vestmannaeyja til að spila körfuknattleik eða hvað þá íþrótt almennt!

Í liði Keflvíkinga eru 4 A landsliðsmenn en þetta eru stórskyttan #10 Magnús Gunnarsson, #7 Jón Nordal Hafsteinsson, #15 risinn Sigurður Þorsteinsson og #5 Arnar Freyr Jónsson. Ekki má gleyma fyrirliða Keflavíkur #4 Gunnari Einarssyni en hann hefur verið viðloðinn landsliðið og svo #6 Þröstur Leó Jóhannsson en hann er mjög efnilegur leikmaður og hefur spilað með yngri landsliðum Íslands! Keflavík hafa einnig innanborðs alls 3 erlenda leikmenn en þeir heita #14 Bobby Walker frá USA en hann er með 24.6 stig og 5 stoðsendingar að meðtaltali í leik, #13 Tommy Johnson frá USA (er með Enskt vegabréf) en hann skorar 21 stig í leik og loks varnarjaxl #9 Anthony Susnjara frá Ástralíu en hann skilar rúmum 7 stigum og 7 fráköstum í leik. Þannig að þetta eru engin smábörn sem við erum að fara spila á móti!

Einungis þrír leikmenn ÍBV hafa spilað í Úrvalsdeildinni en það eru þeir #15 Baldvin Johnsen með Haukum og Val, #12 Arnsteinn Ingi Jóhannesson með Þór frá Akureyri og þjálfarinn #10 Björn Einarsson með Haukum, ÍA og Tindastól. Samtals eiga þessir kappar 112 leiki að baki og skorað 584 stig alls. Hefðu þessir leikir auðveldlega getað verið mun fleiri ef meiðsli og vegna anna í vinnu/skóla hefði ekki verið orsökin hjá þessum leikmönnum. En þeir eru sáttir þar sem þeir eru staddir í dag og munu þessir kappar leiða okkar leikmenn inní þennan leik. Lið ÍBV verður tilkynnt á morgun.

Allir að koma og sjá besta lið landsins spila gegn margföldum Íslandsmeisturum frá Keflavík á sunnudaginn kl.15:00 !