Stórliðið kemur til Eyja......

eyjafrettir.is: Bikarkeppni KKÍ

ÍBV tekur á móti efsta liði úrvalsdeildarinnar 25. nóvember

Björn Einarsson, þjálfari ÍBV á ferðinni í leik liðsins

Þær fréttir voru að berast að B-lið Hamars hefur gefið leikinn sem átti að fara fram á sunnudaginn í forkeppni bikarkeppni KKÍ.  Það þýðir að ÍBV mun taka á móti besta liði Íslands í dag í körfubolta, Keflavík en Keflvíkingar eru í efsta sæti úrvalsdeildarinnar um þessar mundir.  Leikurinn er mikill hvalreki fyrir hinu ört vaxandi íþrótt í Vestmannaeyjum enda leika með Keflavík fjórir landsliðsmenn og þrír erlendir leikmenn auk þess sem Sigurður Ingimundarson, þjálfari liðsins er jafnframt landsliðsþjálfari.

Hamarsmenn eru reyndar ekki eina liðið sem gefur leik sinn gegn ÍBV því Glói hefur gert slíkt hið sama en liðin áttu að mætast í kvöld í Eyjum.  ÍBV átti því að leika tvo leiki í Vestmannaeyjum um helgina en endar með því að leika engan

Björn Einarsson, þjálfari ÍBV var í viðtali hér á Eyjafréttum þegar í ljós kom að ÍBV ætti möguleika á að leika gegn Keflavík.  Viðtalið má lesa hér að neðan.

Draumur að mæta Keflavík
Keflavík er án efa eitt sigursælasta lið körfuboltans á Íslandi og sannarlega hvalreki fyrir hið ört stækkandi körfuboltafélag ÍBV að fá þá í heimsókn. Björn Einarsson, þjálfari ÍBV var þó með fæturna á jörðinni og sagði að fyrst þyrfti að vinna Hamar.

„Það er draumurinn að taka á móti Keflavík og í raun það sem ég óskaði eftir. Ég hefði reyndar viljað mæta þeim seinna í keppninni, í 16 eða 8 liða úrslitum en maður þarf víst einhverntímann að vinna þessi lið," sagði Björn og hló en sjálfur lék hann með Keflvíkingum upp alla yngri flokkana enda fæddur og uppalinn í bítlabænum.

„Það eru þarna nokkrir strákar sem ég kannast við úr yngri flokkunum en helst eru það Maggi Gunnars og Jón Norðdal sem eru báðir landsliðsmenn í dag. En áður en við förum að hugsa út í það að spila gegn Keflavík þá þurfum við að vinna B-lið Hamars. Ég er á þeirri skoðun að ef við erum með fullmannað lið þá eigum við að vinna Hvergerðinga."

Bræðrabylta í 32ja liða úrslitum?
En ef svo fer og þið takið á móti Keflavík, hverjar eru sigurlíkurnar?
„Við getum orðað það þannig að á pappírnum eru þær 2% en í mínum huga 50%. Það sjá það auðvitað allir að þetta er stórlið sem við myndum þá spila gegn, með fjóra eða fimm landsliðsmenn, landsliðþjálfarann og þrjá erlenda leikmenn. En þetta eru fimm á móti fimm og við auðvitað höfum bara gaman af þessu og gerum okkar besta ef af þessu verður," sagði Björn en svo skemmtilega vill til að bróðir hans, Einar Einarsson er aðstoðarþjálfari Keflavíkur. Það gæti því farið svo að bræður muni berjast í 32ja liða úrslitum bikarkeppni KKÍ.

Þegar blaðamaður hafði samband við Björn var hann reyndar staddur í Keflavík og því var hann spurður um það hvort hann væri að njósna? „Ja, ég er reyndar að fara á stórleik Keflavíkur og KR hér í Keflavík í kvöld. Eigum við ekki bara að segja að ég taki bókina með mér og punkti niður helstu veikleika Keflvíkinga," sagði Björn að lokum.